नेपाली हास्यव्यङ्ग्य अनलाइन पत्रिका

हिजो छोरा कृष्णे मर्यो आज बाबु नन्दे !
विरोधीका खप्परैमा हान्छौं गई भन्दे !
लोकतन्त्रे सरकार ! यहाँ यस्तै हुन्छ,
राहतको नाउँ पारी केही रुप्पे गन्दे !
(१)

मिडियामा, सडकमा अधिकारवादी !
नौटंकी भो, जनताको चाहे झरोस् लादी
कस्ले मार्यो ? निसाफको खुल्ने छैन ढोका
नयाँ ‘नरेश’का सुरक्षित गाथगादी !
(२)

नन्दे स्वर्ग पुगिसक्यो यिनी न्यूयोर्कमा ?
संयुक्त राष्ट्रसंघमा कैले त शार्कमा !
फलिफाप सबै ठाउँ डलरको खेती
वाणीमा छ आकर्षण, अजेय तर्कमा !
(३)

नेता, मन्त्री, शासनको देखिसक्यौँ चाला
तिमीबाटै निर्लज्ज भै यिनी भिर्छन् माला !
नारा सुन्दै रमिते झैं चुपचाप बस्छौ,
भन तिम्रो मुखमा छ किन भोटे ताला ?
(४)

दाङ