बूँद रानाबेथा यौटा घरको
धौले घर बनाउँदा राखेनछन् ख्याल
हाल्नै पथ्र्यो हालेनछन् यौटै ढोका झ्याल
घर हेरी दुनियाँले कुरा गर्छन् यस्तो–
किन होला घर पनि पाटी पौवा जस्तो !
बैठकमा ब्वाँसा बस्छन् मझेरीमा साँढे
भान्सा कोठा बिर्ता ठान्छन् बिरालाका ढाडे
सर्प बिच्छी छेपारा र माकुराका लागि
बनाएको घर जस्तो थप सहभागी ।
मुसा साङ्ला लाम्खुट्टे र उडुसले भन्छन्–
संसारमै यस्ता घर अन्त कहाँ बन्छन् !
उल्लु अनि चमेराले यस्तो घरलाई
दर्बार नै ठानेका छन् मोज गर्न पाई ।
अस्तिसम्म ‘नेपाल’ थ्यो यो घरको नाउँ
कल्ले गर्दा ‘पाटी’ भयो कहाँ सोध्न जाउँ ?
एकातिर खेतीपाती अर्कोतिर कुलो
सानो–सानो यो घरको बेथा ठूलो–ठूलो ।
सपूत क्वै भए झट्ट मैदानमा आऊ !
जोगाऊ लौ भताभुङग नेपालको नाउ !
Subscribe
Login
0 Comments
Oldest
