नेपाली हास्यव्यङ्ग्य अनलाइन पत्रिका

बूँद राना :

आगो भएन के भो झिल्को बनेर बाँचौँ
चिसो त हुन्छ मुर्दा तातो बनेर बाँचौँ ।

बौरेर कि उडेर ढाकौँ न यो चराचर
माटो बनेर बाँचौं धूलो बनेर बाँचौँ ।

खै त्यो कहाँ छ भन्दै खोजी गरून् सबैले
बाँचौँ सधैं सबैको खाँचो बनेर बाँचौँ ।

धान्ने त हो नि धर्ती जुक्ति कसै नलागे
घरको निदाल धुरी खाँबो बनेर बाँचौँ ।

मीठोको लोभ गर्दा जुठो कलो निलिन्छ
दागी न भै हमेशा चोखो बनेर बाँचौँ ।

लाचार लाश जस्तो बाँचेर सार के भाे
ठूलै दिई धमाका ज्यूँदो बनेर बाँचौँ ।

ठूलो हुँदा अरूको घट्‌ला कतै उँचाइ
सम्झेर बूँदलाई सानो बनेर बाँचौँ ।

०००
सिद्धार्थनगर-८, रूपन्देही
मो. ९८५११२३४४०