नेपाली हास्यव्यङ्ग्य अनलाइन पत्रिका

बूँद राना :

सच्चा मानिस चैं झुठा हुन गए बाङ्गा भए सज्जन ।
अप्ठ्यारो अति भो खुटाउन अहो को मित्र को दुश्मन ?
शिष्टाचार विचार चिन्तन सबै व्यापार थैलो भयो !
यस्तो कर्म हुँदा हुँदा किन नहोस् नेपाल पैलो भयो !

गेडा अन्न नभै कठै उदरमा भोकै लडेका कति !
बाँडी स्वप्न नयाँ दुहेर जनता प्राडो चढेका कति !
आस्था कञ्चन जो थियो मनुजको बित्रेर मैलो भयो !
गर्दा तल्तिरबाट अङ्क गणना नेपाल पैलो भयो !

पैसा पावरमा बिके अनि कुनै हुस्की र चुस्की महाँ !
धोखा व्यापक भै चुनाव भनिने त्यो स्वच्छ हुन्थ्यो कहाँ ?
शीर्षस्थान थियो अहो सदन जो त्यै भाँडभैलो भयो !
छाडातन्त्र चलाउने चलनमा नेपाल पैलो भयो !

लुच्चा चोर पसे पसीकन बसे ढुक्कै फटाहाहरू !
डुक्रिन्छन् घरमा खुला चउरका छाडा बसाहाहरू !
पाले नै जब भेदिया बनिगयो लाचार दैलो भयो !
आफ्नै बास उठाउने मुलुकमा नेपाल पैलो भयो !

बम्गोला खुकुरी अझै पनि उही बन्दूक भाला छुरा !
वाक्कै छन् जनता सँधैभरि सुनी मार्ने र मर्ने कुरा !
हीरा तुल्य थियो सफा हृदय जो खग्रास मैलो भयो !
मुर्दा चाङ लगाउने मुलुकमा नेपाल पैलो भयो !

कालो कर्म भने पुरस्कृत हुने दण्डित सेतो हुने !
आँसू बग्नु बगी सुके गहहरू रोऊँ कसोरी रुने !
पोखी पीर व्यथा समुज्ज्वल छटा हिमाल कैलो भयो !
थापी अञ्जुलिमा बटुल्न पछुतो नेपाल पैलो भयो !

खुल्ला फाँट तराइका हिमचुली पहाडका टाकुरा
भन्छन् सुन्दछ को ? गरौं जतिसुकै चित्कार हाम्रा कुरा
उल्टो कर्म गरेर स्वच्छ छवि त्यो कालो र मैलो भयो !
सुल्टो कर्म गरे सतोसत अझै नेपाल पैलो छ यो !

०००
रूपन्देही