नेपाली हास्यव्यङ्ग्य अनलाइन पत्रिका

आजकल बिजुलीलाई फुर्सद छैन
कहिले मध्यरातमा आउँछे
कहिले झिसमिसेमै आउँछे
आजकल बिजुलीलाई फुर्सद छैन ।

कहिले वल्लो घरमा बस्छे
कहिले पल्लो घरमा बस्छे
डेरा सरेको सरै गर्छे सधै
आजकल बिजुली सारै थकित छे ।

आजकल बिजुलीलाई आराम छैन
कहिले रात ढल्केपछि आउँछे
कहिले मध्यदिनमै आउँछे
जहिले आउँछे सुनसान हुँदा आउँछे ।

आजकल बिजुलीमा बिश्वास छैन
आजकल बिजुली ठूली भा’छे
भात पकाउँदिन बिजुली–
भाँडा माझी सकेपछि आउँछे
लुगा धुँदिन बिजुली–
लुगा सुकीसकेपछि आउँछे
आजकल बिजुलीलाई समय छैन ।

सबै कहाँ एकैचोटी आउन सक्दिन बिजुली
समय मिलाई मिलाई आउँछे
सबैलाई भेट्ने समय दिन्छु भन्छे
आजकल बिजुली मन्त्रीभन्दा व्यस्त भा‘छे ।

आजकल बिजुलीमा तागत छैन
गाऊँघर टोलटोल घुमीहिँड्छे
कहिले आउँदा आउँदै सुत्छे बिजुली
भन्छे– आज अलि धेरै भयो, धान्न सकिन

आजकल बिजुलीलाई फुर्सद छैन
आजकल बिजुलीलाई आराम छैन ।