नेपाली हास्यव्यङ्ग्य अनलाइन पत्रिका

जनसेवीहरूभन्दा ज्यानमारा आकासिए
राष्ट्रवादीहरूभन्दा भातमारा उकासिए ।
अधर्मी भ्रष्ट मान्छेको छ सम्मान जता तता
भाषा–साहित्यसेवी छन् भानु मोती कता कता ।

सर्वहारा बनी सारा स्वार्थ पूरा गरेपछि
भ्रष्टाचार गरी भारी भकारी नै भरेपछि
मान–सम्मान नेताको हुनसम्म हुने भयो
लोक–कल्याण गर्नेको मान्यता खै कता गयो ?

अखण्ड देशका नेता पाखण्ड गर्न कस्सिए
लाम्टो चुसेर आमाको झाम्टो झैं पार्न तम्सिए ।
उराल्ने जातको नारा भँडुवा, भतुवा भए
जातीय एकता गर्ने बडा नेता कता गए ?

नेताहरू मिले मात्र हित हुन्छ स्वदेशको
एकता चुलिए मात्र जित हुन्छ मधेसको ।
आफ्नै मात्र भुँडी भर्छन् नेताहरू जततता
जनको भावना बुझ्ने नेताहरू गए कता ?

स्वाभिमानी कुनै छैनन्, चाहना सुकिलो हुने
शान्तिको सिर्जना गर्ने, रचना रसिलो हुने ।
जनइच्छा समाए पो ! शान्ति हुन्छ जतातता
लोकको हितमा चल्ने नेता छन् खै कताकता ।
काठमाडौं