नेपाली हास्यव्यङ्ग्य अनलाइन पत्रिका

जुन अनुहारलाइ मैले होस सम्हालेदेखि नै चिनेको थिएँ
आज समयले सार्वजनिक गरिदियो त्यो मुकुण्डो रहेछ
जब परिस्थितिले खुल्नै पर्ने बनायो
थाहा भो अनुहार बेचेर मुकुण्डो लगाई रहेको रहेछ
कसले कुन बेला अनुहार फेर्छ
कसले कुन बेला बोली व्यवहार फेर्छ
अनुमान गर्ने गाह्रो
हाम्रो विचार र विकासको प्रतिनिधि भनेर
भोटले जिताएर पठाएको
त्यहाँ पुगेपछि कसको प्रतिनिधित्व गर्छ
मान्छे हुन्छ कि गधा
खसी बोका हुन्छ कि भेंडा
वा अवसर दिए जस्तै हुन्छ
नयाँ नेपालको सही प्रतिनिधि
विश्वास गर्ने गार्हो

मुकुन्डो भनेर नै चिन्न पाएको भए केही भन्नु नै थिएन
उसले त फेरिरहन्छ अनुहार भनेर अनुमान गर्न मिल्छ
खसी बोका भनेरै पठाएको भए पनि
गुनासो गर्नु पर्ने नै थिएन
सक्नेले किनेर लैजान्छ नि भनेर चित्त बुझाउन मिल्छ
हामीले परिचय गर्दा त ऊ जनावर थिएन मान्छे थियो
हामीले संगत गर्दा ऊ असाधारण त्यागी र सरल थियो
यति गन्हाउने कसिंगर होला ऊ भनेर
कल्पना नै गर्न गाह्रो
जुन सिद्धान्तका कुरा गरेर थाक्दैनथ्यो ऊ
त्यो त हामीलाई निशुल्क उसको दास बनाउने
सजिलो साधन रहेछ
जुन अनुहारलाइ मैले होस सम्हालेदेखि चिनेको थिएँ
आज समयले सार्बजनिक गरी दियो मुकुन्ड़ो रहेछ !

११ अक्टोबर २०१५