नेपाली हास्यव्यङ्ग्य अनलाइन पत्रिका

स्नेह सायमि :

एक दिन
हाम्रो गाउँमा
एउटा अजंगको गिद्ध आइपुग्यो
र
भन्यो—
म शाकाहारी गिद्ध हुँ
म तपाईंहरूका काखे बालकहरू ठुँग्ने छैन
म तपाईंहरूका चल्लाहरू च्यापेर उड्ने छैन
गाउँले हो ! गिद्ध देखेर डराउनु पर्दैन
यो गाउँमा गिद्धहरूको तर्फबाट
गाउँकै सुरक्षाको लागि आएको हुँ
अर्को दिन
हाम्रो गाउँमा
एउटा मोटो श्याल आइपुग्यो
र
भन्यो—
म जोगी हुँ र धर्मात्मा श्याल हुँ
म तपाईंहरूका कुखुरा चोर्ने छैन
म तपाईंहरूका बाख्रा मार्ने छैन
म तपाईंहरूको मन दुखाउने छैन
म श्यालहरूको तर्फबाट
तपाईंहरूको गाउँमा
सुरक्षाको निम्ति खटिएको हुँ
तपाईंहरूले अब सुरक्षाको चिन्ता गर्नु पर्दैन
अहिले यी दुई सुरक्षाकर्मीहरू
हाम्रा गाउँका आँगनहरूमा चहारिरहेछन्
हाम्रा कुखुरा, पाठा, चल्लाहरूको लगत राखिरहेछन्
गाउँलेहरूको सन्चो बिसन्चो सोधिरहेछन्
गाउँलेहरू मध्ये कोही सुरक्षा बिरोधी छन् कि भनेर
खोजिनीति गरिहेछन्
असुरक्षाको कहिल्यै महसूस गर्न नपरेको
चोरी डकैतीको सम्भावनानै नभएको
हाम्रो गाउँमा
गिद्ध पहरा दिइरहेको छ
र श्यालले गरिरहेको छ रखवारी ।

०००
‘पुल र पर्खालहरू’ बाट