स्नेह सायमिकालो सूची
क्रान्तिका नाममा के भन्थें र के गर्थें के देखाउँथें के लुकाउँथें भेटेकै क्षण सबै सबै बताउँछ मलाई भेटै नगराउनु मेरो छेउछाउ पर्नै नदिनु म उसलाई चिन्छु ।
म उसलाई चिन्छु
उसले पनि मलाई चिन्छ
त्यसैले ऊ कालो सूचीमा छ ।
उसले मेरो पुरानो घर देखेको छ
मेरो आँगन टेकेको छ
जुत्ता नपाएर फुटेको गोडाबाट निस्केको रगत
पिंडालु उसिनेर भतेर लगाएको भान्सा
सबै बिगत बुझेको छ
अहिले शहरमा कतै
खोजेर आउला पुरानो नाम लिएर
हाम्रो नयाँ निवास
उसलाई बाटैमा रोक्नु
ऊ कालो सूचीमा छ ।
म उसलाई चिन्छु
उसले पनि मलाई चिन्छ
त्यसैले ऊ कालो सूचीमा छ ।
उ बेलाको उपद्रो उसलाई कण्ठाग्र छ
क्रान्तिका नाममा
के भन्थें र के गर्थें
के देखाउँथें के लुकाउँथें
भेटेकै क्षण सबै सबै बताउँछ
मलाई भेटै नगराउनु
मेरो छेउछाउ पर्नै नदिनु
म उसलाई चिन्छु
उसले पनि मलाई चिन्छ
त्यसैले
ऊ कालो सूचीमा छ
ऊ मेरो कालो सूचीमा छ ।
काठमाडौं
