नेपाली हास्यव्यङ्ग्य अनलाइन पत्रिका

रहरहरू पूरा गर्नुको साटो प्याकिंग गरेर
मन भरी स्टोर गरेको त धेरै भइसक्यो
अब त स्टोर गर्ने ठाउँ छैन है भनेर
जनाउ दिइरहेछ हार्डडिस्क
र त एकातिर पुराना रहरहरू डिलिट गरीरहेको छुं
नयाँ रहरहरू उम्रनै नसक्ने बाँझो बनाएको छुं
तिम्रो खुशी
तिम्रो समृद्धि
तिम्रो मुस्कान
यी पनि मेरा डेस्कटपका
अग्रपंक्तीका रहरहरू छन
तिमीले सुन्नै चाहेनौ मेरो अन्तरमन
बुझनै चाहेनौ मेरो अग्र रहर
मेरो रहर र तिम्रो खुशीको वीच
काल्पनिक खाल्डो
कसले खनिरह्यो थाहा छैन
मेरा रहरहरू पुर्ने कसको इच्छा हो
त्यो पनि थाहा छैन
मैले डिलिट गर्न सकिनँ
यी रहरहरू
कुनै दिन मेरो हृदयको पासवर्ड खोल्न चाह्यौ भने
कुनै दिन मेरो रहरहरूको फाइल खोलेछौ भने
थाहा हुनेछ मेरा रहरहरू के थिए
होइन भने
कुनै पुरानो मोडेलको कम्प्युटर
कुनै कबाडीले लानेछ
अन्दाज गर्नेछ हार्डवेयरको न्यूनतम मूल्य
अमूल्य (?) भित्री फाइलसँग के मतलब उसलाई ?
उसको धर्म अनुसार
बेचिदिनेछ !

०००
रातोघर, काठमाडौं