नेपाली हास्यव्यङ्ग्य अनलाइन पत्रिका

आज आफ्नै मूल ढोका छेउ
पछाडीबाट आएर कुकुरले टोक्यो

त्यो कुकुर बहुलाएको हो की सद्दे हो
वा टोक्दै हिंड्ने बानी लागेको हो
थाहा पाइएन
जे भए पनि आज उसले टोक्यो

अरु बेला पुच्छर हल्लाइ रहन्थ्यो
केही दिन्छ कि भनेर टाउको उठाइ रहन्थ्यो
कहिले दिन्थें केही, कहिले दिन्नथें
तैपनि वरिपरी घुमिरहन्थ्यो
एक जना छिमेकी छन्
हरेक दिन कुकुरहरूलाई खान दिन्छन्
तिनै छिमेकको आदेश पालना गरेको हो
वा आफ्नै विवेकले टोकेको हो
आफैले चिनेको
बेलाबखत मीठो मसिनो खुवाएर हुर्काएको
त्यही कुकुरले आज मलाई टोक्यो

म कुदेको बेला टोकेको भए
एउटा निहुँ हुन्थ्यो
कुनै अनौठो पहिरनमा निस्कंदा टोकेको भए
अर्को निहुँ हुन्थ्यो
आफ्नो मूल ढोकाबाट निस्कन नपाई
सँधै देखिरहेको
पुच्छर हल्लाइ रहेको
टोलकै सुरक्षामा खटिरहेको जस्तो लाग्ने
कुकुरले मलाई टोक्यो ।

०००
रातो घर, काठमाडौंं