नेपाली हास्यव्यङ्ग्य अनलाइन पत्रिका

स्नेह सायमि :

‘आज बिहानैदेखि हात चिलाइरहेको छ आफ्नो त ।’

‘दाहिने कि देब्रे माननीयज्यू ?’

‘सबै काम दाहिने हातले गर्छ। केको देब्रे हात चिलाउनु ?’

‘काम गर्ने र नगर्ने र हात चिलाउने र नचिलाउने कुरोसँग केही सम्बन्ध छैन माननीयज्यू । काम नगरेको हात पनि त चिलाउन सक्छ नि। अनि चिलाउन त जहाँ पनि चिलाउन सक्छ औंलामा, कुहिनोमा पाखुरामा । हात भनेर हुन्छ र ?’

‘औंला चिलाइ रहेछ दाहिने हातको ।’

‘ए औंलासँगसँगै हत्केला पनि चिलाको होला माननीयज्यू ।’

‘हैन कसरी थाहा भो तिम्लाई ?’

‘मलाई थाहा नभए कल्लाई थाहा हुन्छ त माननीयज्यू । मत १२ वर्षदेखि मन्त्रीको सवारी चलाइरहेको ड्राइभर हजूर । माननीयज्यूहरूलाई कतिखेर के चिलाउँछ पनि अन्दाज गर्न सक्छु म त ।’

‘धेरै कुरा नगर । मलाई हात चैं किन चिलायो होला त ।’

‘कतैबाट कि शुभलाभ कि उद्घाटनको प्रस्ताव आउने स‌ङ्केत हो हजूर ।’

‘अनि ?’

‘बेलैमा हात चिलाएको निको भएन भने पूरै जिउ चिलाउँछ नि फेरि माननीयज्यू ।

‘के गर्ने त ?’

‘कतैबाट प्रस्ताव आउँछ कि हेरौं । नभए पिएसापलाई सामान हुने रेष्टुराँको उ‌द्घाटन मिलाउनु पर्याे हजूर । अनि हात, जिब्रो, घाँटी चिलाउने समस्या त्यहीं समाधान हुन्छ ।’

ठीक भन्यौ तिमीले । गाडी भन्दा पनि मन्त्री सांसद नै हाँकेर आको जस्तो छ वा । ‘म गरीबले के हाँक्नु हजूर । मैले त आखिर हजुरहरूको सवारी चलाउने न हो। सबै माननीयको सवारीको सूचना गोप्य राखेको छु हजूर ।’.

०००
काठमाडाैं