नेपाली हास्यव्यङ्ग्य अनलाइन पत्रिका

ठट्यौली– १
एकरात शेरे घर जान बाटोमा उभियो तर कुनै गाडी नरोकिएपछि बिस्तारै आइरहेको एउटा गाडीमा हत्तपत्त चढ्यो, तर गाडी ड्राइभरबिना नै चलिरहेकाले शेरेको हंसले ठाउँ छोड्यो ।

लगभग आधा घन्टापछि गाडी आफैं पेट्रोलपम्पमा रोकियो । शेरे हत्तपत्त गाडीबाट ओर्लियो । एकछिनमा एउटा बूढो उक्त गाडीमा चढ्न आयो ।

शेरे : यो गाडी त आफैं कुद्छ बाजे, यसमा नचढ्नुस्, म त अघिदेखि चढेको, यो गाडीलाई भूतले चलाइरहेको छ ।

बूढाले रन्किँदै शेरेलाई एक झापड हान्यो र भन्यो–
बुढा : पेट्रोल सक्किएर त्यत्रो टाढादेखि गाडी धकेल्दै ल्याएको, गाडीमा तँ पो बसिरा’को थिइस् ?

ठट्यौली– २

ऋषि धमलालाई एकपटक समाचारको खडेरी परेछ, के रिपोर्टिङ गरौं, के रिपोर्टिङ गरौँ भइ’रा बेला बाटोमा उनले ठूलो भीड देखेछन् । भीडको बीचमा कार थियो । कारले कसैलाई हानेजस्तो देखिन्थ्यो तर भीड निकै बाक्लो भएकाले भीड छिचोल्दै भित्र पस्न धमलालाई गाह्रो परेछ ।

‘म ऋषि धमला, हटिदिनुस् त रिपोर्टिङ गर्नुपर्यो’– धमला कराए तर कसैले टेरेनछन् । रिपोर्टिङ त गर्नैपर्यो । धमलाले जुक्ति लगाए । ठूलो–ठूलो स्वरले रुँदै कराउन थाले– ‘यो कारले हानेको मान्छे मेरो बुबा हो, कृपया मलाई अगाडि जान दिनुस्’,

यति सुनेपछि भीडले सट्ट २ चिरा पर्दै धमलाको लागि बाटो बनाइदियो, तर धमला हतार–हतार बीचमा पुग्दा कारको सामु त छटपटाइरहेको गोरु पो लडिरहेको रहेछ ।

ठट्यौली– ३
युवती शेरेलाई एसएमएस गर्दै ।
युवती : प्रिय तिम्रो भरमा म, तिम्रो भरमा
कति बस्नु यो समाजको डरमा ?
आउ बरु मलाई भेट्न मेरो घरमा !

यस्तो एसएमएस पाए पछि शेरे युवतीलाई भेट्न जान्छ, तर ढोकानेर युवतीको बाबुलाई देख्छ, अनि एसएमएस रिप्लाई गर्छ ।
शेरे : नझस्काऊ प्रिय, मेरो मुटुमा आलो घाउ छ,
झ्यालबाट हेर प्रिय, आज तिमीलाई भेट्ने मेरो दाउ छ,
ढोकाबाटै आउने थिएँ तर ढोकानेर तिम्रो बाउ छ !

युवतीले तुरुन्तै एसएमएसबाट जवाफ फर्काई
युवती : खाने मुखलाई जुँगाले छेक्दैन,
साँचो माया अमर हुन्छ कसैले मेट्न सक्दैन
झ्यालबाट किन ढोकाबाटै आऊ प्रिय,
मेरो बाउले आँखा देख्दैन ।

सङ्कलन : चतुरे साइँलो