नेपाली हास्यव्यङ्ग्य अनलाइन पत्रिका

१.सर्वाेत्कृष्ट नेता !

माल पाएर के गर्नू, चाल नपाएपछि ! उत्कृष्ट र सर्वाेत्कृष्ट चीजबिज हुँदाहुँदै पनि नेपालीको हालत कस्तुरीले विना खोजेर संसार चाहारेजस्तो छ । भोकै बसे अथवा काँचै खाए हुनेमा खाना पकाउने भन्छन् । पैदल हिँड्न सकिने रै’छ, मोटर खोज्छन् । केही नगरी बस्दा हुने रै’छ, लौन केही गरौँ भन्छन् । बिजुलीको तार हेरेर चित्त बुझाए हुनेमा लोडसेडिङ भो भनेर रोइलो गर्छन् । कतिसम्म भने नेता र मन्त्री गतिला भएनन् भनेर गुनासो गर्छन् । क्यै गरे नसकिने यी नेपालीलाई !

हामीसँग विश्वकै उत्कृष्ट मन्त्री छन् तर चिन्दैनौँ, विदेशीले चिनाइदिन पर्छ, भनिदिन पर्छ । विदेशीले चिनेर नै त रामशरण महतलाई उत्कृष्ट घोषणा गरिदिएका छन् । हाम्रा भूतपूर्व मन्त्रीहरू उत्कृष्ट र बहालवालाहरू सर्वाेत्कृष्ट हुन् भनेर खोइ चिनेको ? यिनलाई विदेशीले चिने, हाम्ले चिनेनौँ, यो दोष मन्त्री र नेताहरूको कि हामी जनताको ? मन्त्रीहरू राम्रै हो, दोषजति हाम्रै हो । नामै उत्कृष्ट, कामै उत्कृष्ट ! उत्कृष्ट र सर्वाेत्कृष्ट मन्त्रीहरू चिन्न सक्दैनौँ भने उनका उत्कृष्ट काम पनि बुझ्न सक्दैनौँ । हामी जनता पो नालायक रै’छौँ । अब कुन दिन विदेशी मिडियाले ‘उत्कृष्ट नेता निकृष्ट जनता भएको देश नेपाल’ भनेर घोषणा गरिदिन बेर छैन, होस गरौँ है !

२.तस्करको लस्कर

नाकाबन्दी सुरु भएपछि देश लस्करमय थियो । यता हेरे लस्कर, उता हेरे लस्कर । नेपालको लस्कर अन्तरीक्षबाट समेत देखिन्थ्यो रे तर त्यसको औपचारिक पुष्टि नहुँदै लस्कर हरायो, तस्कर आयो । तीन महिनामै देश लस्करमयबाट तस्करमय बनेको छ । तस्करको लस्करचाहिँ अन्तरीक्षबाट पनि छर्लंग देखिन्छ रे ! अन्तरीक्षबाट देखिए पनि सरकारले भने देख्दैन । देख्न मिले पो देख्नू !

तस्करको लस्कर कति लामो हुन्छ, त्यो पत्ता लगाउन मुस्किल छ । लस्करको छेउ या टुप्पोचाहिँ देख्न सकिन्छ तर लम्बाइ ठम्याउन सकिन्न । लस्करको एक छेउ कि सिंहदरबारबाट सुरु हुन्छ कि पार्टी कार्यालयबाट । एक जना मानिसले सिंहदरबार कता छ भनेर सोधेछ । उसलाई जवाफ दिइएछ, ‘तस्करहरूको यो लस्कर नछाडी जानू, ठ्याक्कै सिंहदरबार पुगिन्छ ।’

गजब के भने यस्तो लस्करको हाँगाबिगासमेत हुन्छ । तस्करको लस्करको एउटा हाँगा कालाबजारियाको हुन्छ । कालाबजारियाको लस्कर पनि यति लामो हुन्छ कि विगतको पेट्रोलरग्यासको लस्कर बिर्साइदिन्छ । कालाबजारियाको लस्करको छेउ या टुप्पोचाहिँ स्थानीय प्रशासनबाट सुरु हुन्छ भनेर नाकाबन्दी शास्त्रमा उल्लेख छ ।

३. महान् शब्दहरू

नेपाली समाज तथा राजनीतिमा नयाँ नयाँ शब्दावली आइरहन्छन्, हराइरहन्छन् । कतिपय शब्दावली सदाबहार हुन्छन् । जस्तो कि– वार्ता, सहमति, आन्दोलन, बन्द, लोडसेडिङ, महँगी, कालोबजार, भ्रष्टाचार, सरकारको विकल्प, निर्णायक, निष्कर्षहीन, सहमति नजिक, राहत, प्याकेज आदि ।

नयाँ आएका शब्दावली– नाकाबन्दी, नाका सहज, ट्याङ्कर भित्रियो, चीनबाट पेट्रोलियम आउने, दसगजा, उपप्रधानमन्त्री मण्डल, हावा बिजुली, चाँडै समाधान हुने, तस्करी, सङ्केत आदि ।

हराएका शब्दावली– नयाँ नेपाल, नयाँ संविधान, भ्रष्टाचार नियन्त्रण, विकास, राहत, स्थिरता, समाधान ।

यति भनिसकेपछि थप व्याख्या गर्न पर्दैन, एक–दुईवटा शब्दबाटै दुनियाँले सबै कुरा छर्लङ्ग बुझ्छन् । त्यसैले यी महान् शब्द हुन् । लस्कर लागेपछि लाग्यो लाग्यो, अन्त्य हुन्न । नाकाबन्दी खत्तम भयो भने ‘फेरि नाकाबन्दी गरिदेऊ’ भन्दै तस्करहरू लस्कर लाग्नेछन् । अर्थात, तस्कर उही, लस्कर उही तर काम भने फरक हुनेछ ।

४. यो हो, नयाँ नेपाल
कसैले पत्याएका थिएनन् तर बन्यो नयाँ नेपाल ! तपाईं–हाम्रो घर–आँगनमै आयो नयाँ नेपाल ! खल्तीमा दाम छ ? छ भने माम पाइन्छ । ग्यास, पेट्रोल सबै पाइन्छ । अचेल देश कालोबजारीले चलाएका छन्, त्यसैले सबै चीज सर्वसुलभ छ ।

पहिले सहजै ग्यास पाइन्थ्यो ? भन्नासाथ पेट्रोल पाइन्थ्यो ? अहँ, पाइन्नथ्यो । अचेल जे पनि पाइन्छ । सरकारी आपूर्ति व्यवस्था क्रियाशील हुँदा जनतालाई दुख थियो, तस्कर र कालोबजारीहरूले आपूर्ति व्यवस्था सम्हालेपछि आराम छ । लाइन लाग्न पर्दैन, सिफारिस र तोकादेश चाहिँदैन । तस्करहरूले ठामको ठाम ग्यास र पेट्रोलियम दिन्छन् । फुत्त खल्तीबाट दाम झिक्नुस्, उभिएकै ठाउँमा चाहेको चीज पाउनुस् । खल्तीमा दाम भएर पनि अभाव भोग्नुपर्ने पुरानो नेपाल, दाम भएपछि जे पनि पाइने नयाँ नेपाल हो ।

तपाईंले चिताउने, तस्करहरूले दिलाउने ! गजब छैन त प्रणाली ? सारा मिलेर ल्याएको लोकतन्त्रभन्दा केही नेताहरूले ल्याएको तस्करीतन्त्र पो प्रभावकारी देखियो । त्यसैले यही आरामदायी प्रणाली नै हो– नयाँ नेपाल ।

नेपाल, माघ १, २०७२