नेपाली हास्यव्यङ्ग्य अनलाइन पत्रिका

मैले बोकेर ल्याएँ त्यो पहिलो गाडी
जस्ले बोक्यो महाराजहरू
म चितलाङको एक भरिया
मेरो के नाम हुनु
गाडीको हुन्छ आफ्नो ब्राण्ड
मेरो के पहिचान हुनु
म जन्मेदेखि नै किचिएको छु
बोकेर
मैले नलिएको ऋणको भार
म बेहोसी मैं बरबराइ रहेको छु
लागेर
मैले नपिएको नशाको मात
मेरो नाममा कसकसले सहिछाप गरे
मलाइ थाहा छैन
मेरो काँधमा के के पोको पारेर राखिएको छ
मलाइ थाहा छैन
एक बड्को जाँड र
एक घुट्को कोदोको रक्सी हो
मैले पिउने
मेरो जीवन कसले चुसीरहेछ
मलाई थाहा छैन
कसले मेरो अध्ययन गरी रहेछ
कसले मेरो अनुसन्धान गरी रहेछ
मेरो उत्थानका नाममा
म माथि को चढी रहेछ
मलाई थाहा छैन
सबै कुरा बोक्न सक्ने मेरो काँधमा
जस्ले चढ्यो
उसले किन इर्श्या गरी रहेछ
मलाई थाहा छैन ।

काठमाडौं