नेपाली हास्यव्यङ्ग्य अनलाइन पत्रिका

किन हाम्रो संसारमा इमान्दारकै धज्जी उड्छ
मस्तीमा छन् दुराचारी, सदाचारकै धज्जी उड्छ ।

गुरुजन र मान्यजनको, स्थान छैन हृदयमा
अर्ति, बुद्धि, ज्ञान दिने, मदतगारकै धज्जी उड्छ ।

जाली, झेली, खुराफाती, बस्छन् अग्ला महलमा
गरिब बस्छ झुपडीमा त्यो, घरबारकै धज्जी उड्छ ।

जहाँ खायो त्यहीँ चुठ्ने, बानी गर्छन् धेरै मान्छे
जताततै कृतघ्न छन्, उपकारकै धज्जी उड्छ ।

बाबु आमा तिरष्कृत छन्, मायाँ, दया छैन कतै
निष्ठुरी भो सोच यहाँ, पालनहारकै धज्जी उड्छ ।

निष्ठा, भक्ति, आदर्शता, मिल्केका छन् घुरानमा
राम, कृष्ण, गौतम बुद्ध, अवतारकै धज्जी उड्छ ।

छट्ट्याइँ, फट्याइँ, मारामारी, गर्न सक्ने बन्छ ठूलो
सरल, शिष्ट ‘कोमल’ तथा, मिलनसारकै धज्जी उड्छ ।

पुरानो नैकाप, काठमाडौँ
हाल न्युयोर्क, अमेरिका