नेपाली हास्यव्यङ्ग्य अनलाइन पत्रिका

राजा अकबरको भारदारी सभा चलिरहेको थियो । एक्कासी राजालाई बीरबललाई सताउन ईच्छा जाग्यो ।

‘थाहा पायौ बीरबल हिजोराति मैले गज्जबकै सपना देखेँ नि,।’ अकबरले भने ।

‘कस्तो सपना महाराज ?’

‘तिमी र म आकासमा उडिराखेका रहेछौँ । एक्कासी हामी दुबै आकासबाट तल खस्यौं ।’

‘अनि के भयो महाराज ?’ बीरबलले जिज्ञासा राखे ।
‘म चाहिँ महको कुण्डमा खसेछु, तिमी चाहिँ मलमुत्रको कुण्डमा खसेछौ । अनि त म ब्युँझिइहाले ।’
भारदारी सभामा राजाको यस्तो भनाइले बीरबललाइ निकै झोक चल्यो ।

रिसलाइ साम्य पार्दै बीरबलले भने,– ’हो महाराज मैले पनि यही सपना देख्याथिएँ । तर तपाईं चाँडै ब्युझिनु भएछ । मैले त त्यसभन्दा पछिको पनि देखे नि ।’
‘के देख्यौ बीरबल त्यसभन्दा पछि ?’ अकबरले सोधे ।

’हजुर महको कुण्डमा झरिबक्स्यो । म ढलमल फोहरको कुण्डमा । हजुरको शरीर पुरै महले भिज्यो, मेरो फोह ढलमलको मलमुत्रले । त्यसपछि हामी दुबै त्यहाँबाट बल्लतल्ल बाहिर निस्क्यौं । बाहिर आएपछि मैले हजुरको शरीर चाटेँ, अनि हजुरले मेरो शरीर चाटिबक्स्यो ।’

बीरबलको जवाफले राजा कालोनिलो भए ।