नेपाली हास्यव्यङ्ग्य अनलाइन पत्रिका

हर्दै दुख र कष्ट जाउँ जन हो हामी नयाँ सालमा
आँखामा सबका खुसी रहिरहुन् आएर नेपालमा
पावस् ठाउँ हरेक वर्षहरूमा त्यो उच्च निष्कर्षले
हुन् सारा अनि लक्ष्य पुर्ण मनका हाम्रो नयाँ बर्षले ।
.
भागोस् कष्ट र शोक त्रास अब लौ काटेर डाँडा पर
छावस् हर्ष सदैब उच्च गतिले फालेर हाम्रो डर
मौलावस् अनि जिन्दगी समयमै भेटेर संघर्षले
हाँसोस् जीवन फूल झैं अब यहाँ हाम्रो नयाँ वर्षले ।
.
आँखामा अब साहसै बसिरहुन् पीडा हटाई पर
बन्नेछन् तब पुष्प झै अति खुसी हामी सबैका घर
डेरा त्यो मनमा गएर सबको बस्ने छ है हर्षले
मासी लान्छ सहर्ष पीर अनि लौ हाम्रो नयाँ वर्षले ।
.
भेटिन्छन् अब शान्ति यो मुलुकमा खोज्दै निकालेपछि
बस्नेछन् सुन मात्र आँट दिलमा सन्त्रास ढालेपछि
बन्नेछौँ सब एक सज्जन अहो नौलो परामर्शले
थप्दै आश अनेक जान्छ जन हो हाम्रो नयाँ वर्षले ।

भोजपुर