नेपाली हास्यव्यङ्ग्य अनलाइन पत्रिका

सुन्न पाइन्छ देखिन्नन् अनुहार बजेटको
गरेर सूचना मात्रै के अर्थ हुन्छ भोजको ?
सरकार भयो भान्से जनता भोजमा गए
खाना पुगेन रे फर्के बास्ना लिएर नाकले ।

के भो बजेटको कुरा जनता सोध्न आउँछ
सरकार छ निन्द्रामा ब्युझदैन निदाउँछ
पैसाको भोजमा भान्से अघाउँदैन हत्पत
आफू अघाउँछन् भान्से र बाढ्छन् बल्ल राहत ।

जनता खेल खेल्थे र राज्य खेल खेलाउथ्यो
माछो माछो भन्यो आखिर पर्यो जाल भ्यागुतो
जनता नुनका सोझा छौं हामी ठग्छ राज्यले
बिकास गर्न सक्दैन यात्रा गर्छ बजेटले ।

राम झैं जनता हाम्रा नेता छन् तुच्छ रावण
हजार काम बन्दैन लाखौंको हुन्छ भाषण
अख्तियार गयो खोजि गर्न भन्दै बजेटको
लुकेछ घरमा पैसा ताल्चा लाएर गेटको ।

०००
भोजपुर