नेपाली हास्यव्यङ्ग्य अनलाइन पत्रिका

बजारमा तरकारी खोजें पाएँ यौटा ओल
तारिफ गर्दै मदिसे बोल्यो यो छ असाध्य अमोल।।
तारी खाऊ अचार खाऊ अथवा खाऊ झोल
अति गुणकारी अति मनहारी चक्का काट्नू गोल ।।

फुर्ती लायो मन ललचायो खसखस नोट थमाएँ
डेढ किलोको ढिक्का सिङ्गै किनेर घर ली आएँ ।।
तेल र मसला खूब लगाएँ धैर्य लिएर पकाएँ
कस्तो होला स्वाद भनीकन चाख लिईकन खाएँ ।।

बाबा यो पापीले मार्यो घाँटीमा कोक्यायो
जत्ति धुँदा पनि चैन भएन मदिसेले झुक्यायो ।।
बुझ्दै जाँदा पत्तो लाग्यो पकाउनै गल्ती भो
उसिनी पानी निकाल्नु पर्ने उल्ले बल्ल बतायो ।।

तारिफ मात्रै सुनेर हुन्न बोलीको भर परेर हुन्न
उसिनी झाँको झार्नै पर्ने यस्तो नगरी मीठो हुन्न ।।
कान समाएँ किरिया खाएँ अब ओल भनेपछि पर भागें
साथीहो अनुभूति सुनाएँ साँचो वचन बताएँ ।।

काठमाडौं