नेपाली हास्यव्यङ्ग्य अनलाइन पत्रिका

लाग्यो तीज भनेर हिंड्नु महिला नाचेर पार्टी हल ।
टाढै हुन्छ भनेर भन्नु कसले नारी सबैका बल ।।
छोटो हुन्छ लुगा नहेर्नु कसरी तिघ्रा सबै देखिने ।
लोग्ने छैन यहाँ विदेश तिनका केटा यसै लोभिने ।।

आधा ढाड खुला हुँदैछ तनको छात्ती खुला बन्दछ ।
मिड्डी सर्छ अझै मास्तिर झनै वित्ता जती बँच्दछ ।।
काटिन्छन् पनि केश सुन्दर हुने केटा सरीकै बनि ।
झुक्किन्छन् कतिविध्न मानिसहरु केटा कि केटी भनि ।।

च्यापी च्याप्प चुरोट ठ्याक्क मुखमा छाडी धुँवा फस्फस ।
छाड्दै पढ्न र लेख्न हल्लि दिनहूँ एकान्तको लस्पस ।।
खोजीमा अधिकार हुन्छ महिला कर्तव्य बिर्सी कन ।
लोग्ने आफु त गर्भ धारण गरोस् ली चाहना बेस्कन ।।

आमा लोक चलाउने भनि पुजा गर्ने कसोरी भन ।
आस्था मानुँ र खै जहान घरकी तोडेर लियौ मन ।।
बैनी हौ कि दिदी म जानुँ कसरी निर्लज्ज देखेँ खुब ।
अर्को वर्ष नलेखुँ है त कविता सम्झेर नारी रुप ।।

तिम्रो शान हुनेछ शालिन बने आर्द्र उसै मिल्छ र ।
हौ निर्माण तिमी यही प्रकृतिको सर्वोच्च प्राणी भर ।।
आफ्नो ईज्जत राख नफाल निच भै मानिन्छ राम्रो कुरा ।।
नारी सृष्टि प्रदायिनी सकलकी नारी नभै के कुरा ।।

गुल्मी