नेपाली हास्यव्यङ्ग्य अनलाइन पत्रिका

खगेन्द्र गिरि कोपिला :

यो देशको उन्नति र विकास होला कि नहोला ?
साँच्चै कसैलाई यस्तो आस होला कि नहोला ?

आकाशबाट खसेर रूखमाथि अड्किए जस्तो
यहाँका गतिरोधको निकास होला कि नहोला ?

भोको पेट नारा लाउने बेरोजगार सोधिरहेछ
मेरा लागि गाँस, वास र कपास होला कि नहोला ?

यौटा प्रश्न अनुत्तरित छ हाम्रो सामुन्नेमा
नेपालमा सुख-शान्तिको आभास होला कि नहोला ?

जसको भर परी मैले यो मुटु चुँडेर दिएँ
ममाथि उसैलाई विश्वास होला कि नहोला ?

चिनो भन्दै रुमाल दिएर जाने परदेशी
मजस्तै आजभोलि उदास होला कि नहोला ?

०००
नेपालगञ्ज