नेपाली हास्यव्यङ्ग्य अनलाइन पत्रिका

खगेन्द्र गिरि ‘कोपिला’ :

१.
जति क्रान्ति गरे पनि दिसा गर्ने त खेतमै हो
आफ्नो घर बढारेर फोहोर थुपार्ने त गेटमै हो
हजार, लाखका लुगा लगाए पनि के गर्नु हजुर !
मासुको भोज खाएर हाड फलिने त कार्पेट मै हो ।

२.
तरबार फनफनी घुमिरहेछ अचेल कलमको शिरमा
भ्रष्टहरू कुर्सीमा पुगे अपराधीहरू मन्दिरमा
नारा, ढुङ्गामुडा र गालीभन्दा अरू केही जानेनौँ
सके यत्ति लेखिएको रहेछ कि नेपालको तक्दिरमा ।

३.
वर्ग र दलभन्दा ठुलो देश हो, यो कण्ठ गर्नुहोस्
चर्का नारा लाउने स्वर कृपया मन्द गर्नुहोस्
आफ्नै आङ कन्याइ छारो उडाइ जग हँसाउने
भयो हजुर भयो अब त यो खेल बन्द गर्नुहोस् ।

४.
हाम्रा बुद्धि, दिमाग र गिदीहरू बिके कौडीको मोलमा
हाम्रा रीति, थिति र विधिहरू बिके कौडीको मोलमा
नयाँ नेपाल बनाउने नारा केवल भित्तामै लेखियो
चुनेका हाम्रा प्रतिनिधिहरू बिके कौडीको मोलमा ।

०००
नेपालगञ्ज
‘कालध्वनि’ (२०८०)