नेपाली हास्यव्यङ्ग्य अनलाइन पत्रिका

१. तीज

माइती घर होइन, रेष्टुरेन्टमा जाऊ डार्लिङ ।
चुस्कीसँगै चुरोट तान्दै, मस्त दर खाऊ डार्लिङ ।।
फजुल खर्च जति सबै कन्ट्रोल गर्नुपर्छ अब ।
लाजका गहना पुरै ढाक्ने स्मार्ट ड्रेस लाऊ डार्लिङ ।।

२.प्रतिष्ठा

समाजको आँखामा छारो हाल्न जान्नुपर्छ ।
पैसा टिप्नलाई चारो हाल्न जान्नुपर्छ ।।
सोझो औँलाले घीऊ आउँदैन साथी ।
सबैको मस्तिष्कमा पारो हाल्न जान्नुपर्छ ।।

३.फर्मूला

सबैले सिकियो अब, काम नगरी पैसा कमाउने फर्मूला ।
बुद्धि भन्दा मूढेबल ठूलो मानेर रमाउने फर्मूला ।।
एनि हाऊ, पैसा कमाऊ विकासको मूलमन्त्र हो साथी ।
चोर, डाँका, फटाहा मिली इमान्दारलाई समाउने फर्मूला ।।

०००
स्याङ्जा