नेपाली हास्यव्यङ्ग्य अनलाइन पत्रिका

१.
यो देशमा जालझेल कस्तो बिचित्र हुँदैछ
पञ्चामृत अशुद्ध होलीवाइन पवित्र हुँदैछ
यसरी फेरियो कि पाठ्यक्रम राजनीतिको
इमानदार ढोका बाहिर बेइमान भित्र हुँदैछ ।

२.
यतै बस्नेछन् चमेराहरू दिनमै रात भएपछि
अन्दाज गरौँ के होला बिष्टाको वर्षात् भएपछि
घटाइन सक्छ उचाई नाप आफ्नै सगरमाथाको
पराइका थुम्का थुम्की ठूला देख्ने जमात भएपछि ।

३.
कोही दक्षप्रजापति र कोही शिखण्डी आकारमा छन्
कोही आफ्नै अस्तित्व र राष्ट्रियताको व्यापारमा छन्
खोज्नु पर्दैन सत्तुरहरू अब कुनै माफियाका सेल्टरमा
यो देशका नामुद दुश्मनहरू तैनाथ सिंहदरबारमा छन् ।

४.
माथि तानेझैँ गरी झुक्क्याई खसाल्नेको काम छैन
हिँसाको ताण्डव रच्न दुनियाँ उचाल्नेको काम छैन
माटोले खोज्दैछ सङ्कटमा देश बचाउने तारनहार
मुखमा देश र मुटुमा लेण्डुप बसाल्नेको काम छैन ।

५.
कुशासनको संक्रमण नफैलिएको कुनै बस्ती भेटिंदैन
हप्ता असुलीको धन्दा छ चर्को सुरक्षा गस्ती भेटिंदैन
फजिती राम शाहको गर्दैछ राजधानीको एउटा सडक
कानुन किन्ने सामर्थ्य छैन भने न्यायको अस्थी भेटिंदैन ।

०००
गुल्मी