नेपाली हास्यव्यङ्ग्य अनलाइन पत्रिका

प्रमोद भट्टराई ‘प्रतीक’ :

(१)
अदृश्य भएर पनि सबैको मनमा, लुकेर बस्छ दशैँ
आफ्नो शुभ साइतलाई पर्खिएर, ढुकेर बस्छ दशैँ
साझा पर्व भनेर सबैको सद्भावना हुँदा हुँदै पनि
कसैलाई पाखा कसैको काखमा फुकेर बस्छ दशैँ !

(२)
कसैको पोहोर साल जुर्‍यो कसैको यसपालि हुन्छ
कसैको निधारमा टिका हुन्छ कसैको खाली हुन्छ
अवसर पाउनेहरू सबैले खुसीयाली बाँड्दै गरौँ है
कसैलाई प्रिय लाग्छ यो दशैँ, कसैलाई जाली हुन्छ !

(३)
धेरैलाई उमङ्गका अवसरहरू जुटाइदिएर जान्छ
थोरैलाई पिर र व्यथाको भारी बोकाइदिएर जान्छ
खुसीका कोसेलीहरू बोकेर ल्याउने पनि यही दशैं
निष्ठुरी बन्छ कहिले मनै खल्लो बनाइदिएर जान्छ !

०००
विराटनगर