नेपाली हास्यव्यङ्ग्य अनलाइन पत्रिका

प्रमोद भट्टराई ‘प्रतीक’ :

१.
विवेक छैन बुद्धि छैन कसैमा कसैको पनि भर छैन
आफू उच्च बन्नु बाहेक, अन्य कुनै कुरामा रहर छैन
त्यस्तैलाई विश्वास गरेर, काँधमा बोकेर हिँड्नाले नै
देशकै अवस्था खस्कियो, बनाउन कसैलाई कर छैन ।

२.
‘लोग्ने स्वास्नीको झगडा परालको आगो’ भने जस्तै
अब राजनीतिमा पनि देखिन थाल्यो दृष्यहरू त्यस्तै
पानी बाराबार गर्नेहरूको, देखावटी गठबन्धन भएर
जनता झुक्याउन आए फेरि आआफ्नो मुड्की कस्तै ।

३.
आशा र भरोसा खुवै गरिए’थ्यो, त्यही नै खराबी रह्यो
उत्साहको झलक देखियो मात्रै, निराशा नै हाबी भयो
चोर्ने फोर्ने र सोहोर्नेहरूको घम्साघम्सी थियो मैदानमा
ढिकुटी खोल्न खप्पिस जो छ उसकै हातमा चाबी गयो ।

०००
कौशलटार, भक्तपुर