नेपाली हास्यव्यङ्ग्य अनलाइन पत्रिका

रमेश समर्थन :

१.
म चिठीभित्रको विषय हेर्दिनँ, खाम हेर्छु
म ज्ञान र गुण हेर्दिनँ, दौलत र दाम हेर्छु
मेरो दृष्टि नै यस्तै छ यसमा मेरो के दोष
म रचनाको स्तर हेर्दिनँ, लेख्नेको नाम हेर्छु ।

२.
तपाईँ भित्ता र आली काट्नुस्, म खेतका गरा काट्छु
तपाईँ उठ्ने आकाश काट्नुस्, म उभिने धरा काट्छु
आउनुस्, मिलेर काटौँ यो संसारकै पुरानो संस्कृतिलाई
तपाईँ माथिका हाँगा ठुन्क्याउनुस्, म फेँदका जरा काट्छु ।

३.
महाशय, तपाईँ सोचिनुहुन्छ, म सोच्नेमा परेँ
महोदय, तपाईँ त रोजिनुहुन्छ, म रोज्नेमा परेँ
हाम्रो बाटो, साधन र गन्तव्य एउटै नै हो तर
महामहिम, तपाईँ खोजिनुहुन्छ, म खोज्नेमा परेँ ।

४.
जो दोषी छन् तिनले टाउको लुकाएर कुरा गर्छन्‌
जो निर्दोष छन् तिनले टाउको उठाएर कुरा गर्छन्‌
होँचा मान्छेको टाउको सधैँ उठेकै हुन्छ नि हजुर
जो अग्ला छन् तिनले टाउको झुकाएर कुरा गर्छन् ।

०००
रूपन्देही