नेपाली हास्यव्यङ्ग्य अनलाइन पत्रिका

शैलपुत्री र रुद्रनाथ उपाध्यायका सुपुत्र गोविन्द भट्टको जन्म १९९६ साउन ३ गते पुनरेवा, रौतहटमा भएको थियो । दर्शनशास्त्रमा स्नातकोत्तरसम्मको औपचारिक योग्यता हासिल गरेका भट्टले आफ्नो सक्रिय जीवन अनुसन्धान अधिकृत, भाषा विशेषज्ञ, लेखन तथा समालोचना सेवा अन्तर्गत समर्पित गरेका थिए । नेपाल प्रज्ञा प्रतिष्ठानको एक कार्यकाल प्राज्ञ सदस्य समेत रहेका भट्टकाे पहिलाे प्रकाशित रचना ‘शोषित पुकार’ (२००८ युगवाणी) हाे । भट्टका ‘शान्ति सन्देश’ (खण्डकाव्य, २०२३) लगायत दर्शन, निबन्ध तथा समालोचनाका झण्डै आधा दर्जनभन्दा बढी साहित्यिक कृतिहरू प्रकाशित छन् । भट्ट ‘कृष्णमणि साहित्य पुरस्कार, (२०५१)’, ‘नारायणी वाङ्मय पुरस्कार, (२०५९) लगायत थुप्रै साहित्यिक पुरस्कार तथा सम्मानद्वारा पुरस्कृत, सम्मानित स्रष्टा हुन् । नेपालीको श्रीवृद्धि तथा उन्नयनमा अतुलनीय योगदान पुर्‍याएका भट्टको निधन २०६८ असोज २५ गते काठमाडौंमा भएको थियो ।