नेपाली हास्यव्यङ्ग्य अनलाइन पत्रिका

हिजोको अथाह चमक बोकेको
म आजको अँध्यारो हुँ,
मलाई सुम्सुम्याएर हेर,
मभित्रको उर्जा
तिमी स्वयम् भएर देख्नेछौ ।

चाहेर पनि
अटाउन नसक्ने पानामा
म सिर्जना हुँ,
म स्रष्टा हुँ ।

मसित गफिएर हेर,
मेरा हर शब्दहरू, अनुभवहरू
तिम्रा नसा नसामा
धमनी र शिराहरूमा
रगत र अक्सिजन बनेर
बगिरहेको महसुस गर्नेछौ ।

हो,
सक्छौ भने
मोबाइललाई दिने समय
मलाई दिएर हेर,
मलाई सुम्सुम्याएर हेर,
मलाई पढेर हेर ।

खोज,
मभित्रका सम्भावनाहरू
मेरो बुढ्यौलीभित्रको
ज्ञान, जवान र उर्जा ।

मलाई पुस्तक बनेर
हरेकको मस्तिष्कमा पुग्न मन छ ।
मलाई तिम्रो जवानीभित्र
आफ्नो अनुभव र उर्जा मिसाएर
मभित्रको तिमी र तिमीभित्रको
‘म’ भएर बाँच्न मन छ ।

के तिमी वृद्ध तनको
जवान चाहना
पूरा गर्न सक्छौ ??

०००
लालबन्दी -८, सर्लाही