नेपाली हास्यव्यङ्ग्य अनलाइन पत्रिका

१
हिँड्छु भन्ने पाइलानै छोडिसके टेकनलाई
अक्षरका भावहरू मोडिसके लेखनलाई ।
स्वच्छ जीवन पारखीमा सवै थिए माया हाम्रा
बुढेस कालको सहारामा नपाइने खुसी राम्रा ।

२
आँसु मेरा धेरै झरे देख्न छोडे नयनले
साथ मलाई छोड्दै गए कर्म र वचनले ।
थिर हुन्न मनको वह कोहि छैन भन्नू हाम्रो
बुढेस कालको सहारामा नपाइने खुसी राम्रो ।

३
पिर सुर्ता जति गर्यो त्यतिनैछ आत्मग्लानि
माया मोह तोडिदैछ मात्र बाँकि एउटा प्राणि ।
वृद्धा जीवन देख्यौ रोगि के को आशा छर हाम्रो
बुढेसकालको सहारामा नपाइने खुसी राम्रो ।

४
चल्नहल्न सकिँदैन आफू पनि कतै तिर
पारिवारिक झमेलाले सधै मन भित्र पिर ।
कहाँ गई ठोक्किने हो लक्ष छैन कतै हाम्रो
बुढेस कालको सहारामा नपाइने खुसी राम्रो ।

५
कोहि भन्छन् अविवेकी कोहि भन्छन् साहु मारा
खुसी वचन छैन कहिले रिसै गर्छन् मलाई सारा ।
छोड्न पनि नसकिने कस्तो रैछ देह हाम्रो
बुढेशकालको सहारामा नपाइने खुसी राम्रो ।

६
एक डल्लो पिठो खान वचन राम्रो भए हुन्थ्यो
स्वर्ग जस्तो महलमा नत्र मन किन रुन्थ्यो ।
ईराधामा अल्झिएन सुख भोग गर्ने हाम्रो
बुढेसकालको सहारामा नपाइने खुसी राम्रो ।

७
हाँसिखेली बित्यो जीवन सुख भोग गर्न पाइनँ
लाला बाला हुर्काउँदैमा जीवन अन्त सर्न पाइनँ ।
बन्धक झै बित्यो जीवन तर हाँसि खेल हाम्रो
बुढेसकालको सहारामा नपाइने खुसी राम्रो ।

८
पढ्दै बढ्दै हुर्कि गयौ माया तिम्रै हुन्छ हुन्छ
बुढेसकालमा सवले छाड्यौ हृदय त रुन्छ रुन्छ ।
कसोगरि खाने होला कस्तो रैछ कर्म हाम्रो
बुढेसकालको सहाराले नपाइने खुसी राम्रो ।

९
हाम्रा लागि के नै छ र उमेरले डाँडा काट्यो
पारिवारिक साथ छैन हाम्रो मन त्यसै फाट्यो ।
माया मोह हुन्न रैछ जति भए पनि हाम्रो
बुढेसकालको सहाराले नपाइने खुसी राम्रो ।

१०
हिजो थियौं हामी पनि जवानीका धनी
आज छोरा छोरी हिँडे अरुकैका बनी ।
बसिराछौँ मृत्यु कुरि कहिले जाला जीवन हाम्रो
बुढेसकालको सहारामा नपाइने खुसी राम्रो ।

०००
सूर्यविनायक, बालकोट
९८४१४६४४५७