नेपाली हास्यव्यङ्ग्य अनलाइन पत्रिका

कृष्णप्रसाद पौडेल जस्ताघरे :

छ यो वृद्धावस्था कठिनपनक‍ो तागत घट्यो ।
पिता माता पाका शिथिलजनका राहत गुम्यो।।
अझै बा आमाका पिर सकसका क्रन्दन बढ्यो।
कडा धक्का मार्ने प्रलयसरिका कम्पन दियो।।
१

सयौँ पीडा झेल्दै प्रिय जननका रक्षक बने ।
वधू छोरा छोरी कुटिल मनले निष्ठुर बने ।।
पिताका माताका जतन सिपले सक्षम भए ।
बुबा आमा छोडी ऋणधन गरी बाहिर गए।।
२

बुहारी छिन् बाठी सुत पनि अहो ! चल्छ कसरी ।
परेवाको जोडी घुरघुर गरी घुर्छ जसरी ।।
यता बाबा माता खुब विवशमा छन् विरहमा ।
वधू छोरा छोरी मुसुमुसु गरी छन् रहरमा।।
३

यहाँ बाबा आमा असल नमुना हुन् प्रगतिका।
कठै जोडी छुट्दा विचलित कथा छन् विकलका ।।
वधू आँखा तर्छिन् अनि सुत अझै भन्छ सुतुवा।
छ आफ्नै छोरो त्यो खलसरि भने बन्छ चितुवा ।।
४

न छन् बाधा हर्ने न वरपर छन् मित्र सँगिनी।
दया गर्ने कोही मनुज नहुँदा व्यर्थ छ जुनी।।
यसो भन्दै रुन्छन् धुरुधुरु पिता मातृ घरका।
यहाँ बा आमाका जनन किन छन् छुद्र मतिका ?।।
५

प्रिया साथी मिल्लान् विविध गुणका स्वर्ण धनले ।
गुमेका बा आमा यस अवनिमा भेट्छ कसले ?।।
पिता माता त‍ोड्दा अशुभ सपना देख्छ भयको ।
करोडौँ पैसाले जनक जननी मिल्छ कसको ?।।
६
०००
बट्टार,नुवाकोट । हाल: बालाजु, काठमाडौं