नेपाली हास्यव्यङ्ग्य अनलाइन पत्रिका

कविराज घिमिरे :

१.
वृद्धका पासमा श्याम छन् राम छन्
रातमा जून छन् मध्यमा घाम छन्
चाहियो जे भनुन् पाइने छन् त्यहाँ
लाखका कट्कटे दामका खाम छन् ।।

२.
जो बसे वृद्धका पासमा हुन् बडा
जो दिने छन् मिठो गाँसमा हुन् बडा
भाग्यमानी बने पुत्रपुत्रीहरू
प्रेम जो गर्दछन् खासमा हुन् बडा ।।

३.
वृद्धका हार हुन् नाति या नातिनी
हातका सार हुन् नाति या नातिनी
टेक्न लौरो दिने हेर्न चस्मा पनि
फाइदाकार हुन् नाति या नातिनी ।।

४.
पाक्तछन् रापमा शान्त छन् वृद्ध यी
एकलैमा हुँदा क्लान्त छन् वृद्ध यी
खेप्तछन् दु:खका झ्याउला तापनि
धीर छन् वीर छन् कान्त छन् वृद्ध यी ।।

५.
पूर्णिमा को बने बुद्धझैँ लौ भन ?
को छ संसारमा सिद्धझैँ लौ भन ?
खोज साथीहरू सृष्टिको आँगन
लोभ फ्याँक्ने छ को वृद्धझैँ लौ भन ?

०००
भक्तपुर