नेपाली हास्यव्यङ्ग्य अनलाइन पत्रिका

कविराज घिमिरे :

छोरी

छोरीको भरपर्छ विश्व हँसिलो पार्छिन् भनी सन्तति
छोरीको गुणबाट दुर्जन हटी ज्ञानी हुनेछन् कति
छोरीले घर धान्दछिन् सहजले आत्मीयता भर्दछिन्
छोरीको बलबाट सिर्जन हुँदा सन्ताप यी चिर्दछिन् ।।१

नास्छिन् रोग अनेक झट्टसँगले मुस्कानका वेगले
पार्छिन् डाह समाप्त एक पलमा हेर्दा मिठो प्रेमले
के लेखूँ म रहस्य बुझ्न नसकी आश्चर्यमा छन् सब
छोरीमा छ अनन्त शक्ति मुटु नै पग्लिन्छ आफैँ जब ।।२

जो छन् पत्थर आँत धूलि मनका गल्छन् छिटै ती पनि
जो छन् घामट स्वाँठ धूर्त पनका जल्छन् छिटै ती पनि
टिक्तैनन् कहिल्यै असत् मन भए पर्छन् निचा दृष्टिमा
छोरीको कुभलो चिताउन पुगे वैलिन्छ यो सृष्टिमा ।।३

छोरीले रिस त्याग गर्छ कुभलो नासिन्छ आफ्नै मति
आमा हुन् अथवा वधू कि त उनी सासू गरून् ज्यादती
एकै हो जसले अधोमुख गरून् सप्रिन्छ के आलय ?
भन्छन् दुस्कर यी भनेर सबले टाढिन्छ आफ्नै वय ।।४

छोरीले अपवित्रका नव घडा फोरेर फ्याँकेपछि
बन्छ जीवन बल्लतल्ल हँसिलो सद्भाव राखेपछि
यस्तो गौरव कर्म गर्न कहिल्यै सक्तैन कोही जन
छोरीको छ निदान शक्ति दरिलो संसारकै कञ्चन ।।५

०००
भक्तपुर