नेपाली हास्यव्यङ्ग्य अनलाइन पत्रिका

देवीप्रसाद मिश्र :

सुन्दर भवमा जन्म दिलाए ।
आदर गर्दै बाँच्न सिकाए।।
सेवक बन्नु छ थाम्न इमान ।
वृद्ध सबै हुन् ईश समान।।१।।

वृद्ध र वृद्धा साथ भएमा।
मन्दिर हाम्रो हुन्छ घरैमा ।।
सुन हे घरका बाल जवान ।
वृद्ध सबै हुन् ईश समान।।२।।

सन्ततिलाई नित्यपलामा ।
जीवन धान्ने सत्य कलामा ।।
प्रेरक बन्ने साँझ बिहान
वृद्ध सबै हुन् ईश समान।।३।।

ज्ञान अथाह छ छैन हिसाब।
भित्र सफापन सत्य निसाफ।।
छैन कसैसित कटु,अभिमान।
वृद्ध सबै हुन् ईश समान।।४।।

कत्ति नहेरी प्रतिफल,अन्त ।
अनुचर भन्दै ग्रीष्म वसन्त ।।
कति पर फाले, छैन निसाना
वृद्ध सबै हुन् ईश समान।।५ ।।

क्रमसित गर्दै श्रम दिनरात ।
समय बिताए, अनुभव साथ।।
सहज बनाए, सब परिधान ।
वृद्ध सबै हुन् ईश समान।।६ ।।

०००
साेह्रखुट्टे, काठमाडाैं