नेपाली हास्यव्यङ्ग्य अनलाइन पत्रिका

घनश्याम रेग्मी :

प्रेमले जतन जो शिशु गर्थिन्
दुग्धले सुमनका तन भर्थिन्
कष्टका अनल तप्त सहेकी
मातृका सलिल तोय बहेकी ।।१

कोखमा म रहँदा कति कष्ट
कार्यका लहर ती छरपस्ट
भित्रका कहर जीवन ठान्यौ
चित्तका रहरमा घन हान्यौ ।।२

काँधमा अटुट ती अभिभारा
पेटका जलन ती कति सारा
भोकको समयमा कति खायौ
गीत ती विरहका कति गायौ ?३

पर्दथे उदरमा कति मुक्का
लाग्दथे वदनमा कति धक्का
आँसुले नयन पत्र भिजाई
तै खुसी जनित कष्ट उठाई ।।४

आज यो कलमले जति लेपूँ
शब्दमा नयनका रस खेपूँ
याद सो हजुरको मृदु घेरो
मातृका चरणमा शिर मेरो ।।५

०००
नारायणपुर, विकास चोक ५, चितवन