नेपाली हास्यव्यङ्ग्य अनलाइन पत्रिका

कविराज घिमिरे :

तपाएर आगो र खास्टो लपेटी
भगाएर जाडो तलै भित्रदेखि
सदानन्द पार्ने बुढ्यौलीहरूमा
नमस्कार मेरो विवेकी सबैमा ।। १

ठिकै मन्द तातो पियाएर पानी
तपुन् घाम नित्य मजाले बिहानी
सुनुन् देववाणी सुधा भक्ति गाना
न सेलाउँदैमा दिउन् शुद्ध खाना ।। २

सबै आङ ढाक्ने लुगा टम्म पारी
उडाएर ठन्डी र खोकी लघारी
परैबाट सर्दी भगाउन् जहान
यिनै ज्येष्ठ हाम्रा ठुला हुन् मुहान ।। ३

नहेपी कसैले बडो प्रेमसाथ
रमाएर पालुन् समाएर हात
बुढ्यौली सबैको उही हो धरौटी
मुसारेर दारी स्वयं घुम्छ भेटी ।। ४

नसुन्ने हुने छन् नदेख्ने हुने छन्
न बोली छ प्रष्टै न बास्ना लिने छन्
नमानेर झर्को गरे जो सह्यार
बुढ्यौली नमस्कार मेरो हजार ।। ५

०००
भक्तपुर