नेपाली हास्यव्यङ्ग्य अनलाइन पत्रिका

विदुर अधिकारी :

अधिक कान्ति भरौँ अनुहारमा
मधुर शान्ति छरौँ घरबारमा
कलुष कत्ति नहोस् व्यवहारमा
असल वृद्ध बनौँ परिवारमा

वचन मिष्ट रहोस् जनमाझमा
सकसयुक्त नहोस् अवधारणा
मननयोग्य रहोस् प्रिय जीवनी
असल वृद्ध बनौँ जगमा गुणी

हृदय दुख्छ यहाँ नगरौँ छल
प्रणय हुन्न जहाँ नगरौँ बल
छ परिवार भने बुझ हो धन
असल वृद्ध बनौँ धरी सद्मन

सहज हट्छ भने कटुता घना
प्रणय साथ गरौँ मृदु साधना
पछि सरी नबसौँ सब वृद्ध हो
नव निसान छरौँ अब वृद्ध हो

समय आउछ जान्छ सधैँभर
समयको उपयोग गरौँ तर
नहुन सक्छ भलो परलोकमा
सफल वृद्ध बनौँ यस लोकमा ।

०००
चितवन