नेपाली हास्यव्यङ्ग्य अनलाइन पत्रिका

विदुर अधिकारी :

हे ! वृद्ध हो नित्य विचार गर्नू
लोभी बनी यो जगमा नचर्नू
राख्नू खुसी ती घरका जहान
होस् वृद्धबेला सुखको निसान ।

कामान्ध भै कामुकता धरेर
भोगी नबन्नू ममता हरेर
यो जिन्दगीमा भर दिव्य ज्ञान
होस् वृद्धबेला सुखको निसान ।

सन्तोष राखीकन कर्म गर्नू
चिप्ला कुराका भरमा नपर्नू
त्यो आत्ममा होस् बलियो इमान
होस् वृद्धबेला सुखको निसान ।

दम्भी बनी त्रास हुँदैन घोल्नू
अन्यायको पक्ष लिई नबोल्नू
योगी बनी गर्नु छ नित्य ध्यान
होस् वृद्धबेला सुखको निसान ।

गीता पढी सार प्रसार गर्नू
जे बोल्दछौ त्यो व्यवहार गर्नू
राख्नू भलो दिव्य स्वभाव जान
होस् वृद्धबेला सुखको निसान ।

०००
चितवन