नेपाली हास्यव्यङ्ग्य अनलाइन पत्रिका

कविराज घिमिरे :

रम्दछन् वृद्धका आँतमा ईश्वर
निस्किँदै भाग्दछन् पापका डङ्गुर
स्पर्श गर्छन् जहाँ फक्रिँदै पालुवा
फुल्दछन् फल्दछन् वृद्धमाया सदा ।। १

वृद्ध हुन् बालका थालनी पूर्णता
दाग फाल्दै सधैँ ल्याउँछन् शुद्धता
ऊ परै देखिँदा हर्ष नै नाच्तछ
वृद्धमाया परे सिर्जना हाँस्तछ ।। २

वृद्धमाया घटी बिग्रिँदा सन्तति
पर्दछन् गर्तमा हुन्छ के उन्नति
प्रेम होस् वृद्धमा मिल्दछन् आसिक
कामना पुग्दछन् बन्छ जो आत्मिक ।। ३

वृद्धका पाउमा ढोगियोस् माथले
वृद्ध हाँसुन् बधू पुत्रका साथले
तिर्सना मेटियुन् वृद्धका जे पनि
पाउँछन् लोकले वृद्धमाया अनि ।। ४

वृद्धका साथले हट्तछन् दुर्गुण
कामना पुग्दछन् बढ्दछन् सद्गुण
जो बसी गर्दछन् दैनिकी चाकर
वृद्धमाया लिने व्यक्ति छन् आदर ।। ५

०००
भक्तपुर