नेपाली हास्यव्यङ्ग्य अनलाइन पत्रिका

मलको भाउ बढाऊ
फलको भाउ बढाऊ
तरकारी भाउ बढाऊ
सरकारी भाउ बढाऊ
जनतालाई गर्लम्म लडाऊ ।

तेलको भाउ बढाऊ
नचलेको रेलको भाउ बढाऊ
चिया सेलको भाउ बढाऊ
जनतालाई सुलीमा चढाऊ ।

जुसको भाउ बढाऊ
घुसको भाउ बढाऊ
भ्रष्टाचार बढाऊ
अत्याचार बढाऊ
जनता हाँसी हाँसी मर्न तयार छन्
महङ्गीको फाँसी चढाऊ ।

लोकतन्त्र नाममा तिमीले जति अत्याचार गरे पनि
गणतन्त्र नाममा तिमीले जति शोषण गरे पनि
यहाँ न प्रतिपक्ष बोल्छ न कोही बोल्छ
यस्ता कुराले न नेतालाई पोल्छ न पार्टीलाई पोल्छ
दुई चार दिन ती फिस्टे भातृ सङ्गठन बोल्ने हुन्
तीनको अनुहारमा, यिनै भाउ बढाउनेहरूकै खोल छ ।

बढाऊ बेसरी बढाऊ
जे जे सक्छौ बढाऊ
तिम्रो भत्ता बढाऊ
तिम्रो सत्ता बढाऊ
बरु बिकास घटाऊ
राहत घटाऊ
भत्ताले पुग्दैन भने लुगा लत्ता बढाऊ
अझ सक्छौ भने वृद्धभत्ता घटाऊ ।

जनता त यहाँ खप्न नसकेपछि
कोही पारितिर जालान्
कोही खाडीतिर जालान्
त्यत्रो पसिना बगाएपछि
एक छाक त कसो नखालान् ?
बढाऊ बढाऊ
सुनको भाऊ बढाऊ
नूनको भाऊ बढाऊ
घ्यूको भाऊ बढाऊ
बिउको भाऊ बढाऊ
तिमी जस्तो सिमित मान्छे मिलेर
जनतालाई सुलीमा चढाऊ ।

यसरी बढाउ कि
जनतालाई महङ्गिको रापले डडाऊ
खान न नपाएर पुक्लुक्क पुक्लुक्क लडाऊ
तिमीलाई के हुन्छ ?
महङ्गी बढ्यो भनेर
न तिम्रो श्रीमती रुन्छ
न तिम्रो छोराछोरी रुन्छ
रुन्छ त सर्वसाधारण रुन्छ ।

काठमाडौं