नेपाली हास्यव्यङ्ग्य अनलाइन पत्रिका

जेसुकै जुनसुकै कामहरू गर्दा होस, गरिएको होस् वा भविष्यमा गरिने योजना होस् तिनमा जताततै देखिने नदेखिने प्वालहरू प्रसस्तै हुन्छन् । कुनै प्वाल अलि ूठुला हुन्छन र देखिन्छन् तर कुनै प्वाल नाङ्गो आँखाले नदेखिने हुन्छ तर प्वाल चाहिँ हुन्छ । मानिसको शरीरमा पनि देखिने प्वालहरू र नदेखिने प्वालहरू हुन्छन् । देखिने प्वालहरूको र नदेखिने प्वालहरूको महत्व आ-आफ्नै हुन्छन् । तिनका व्याख्या सान्दर्भिक रहेनन् । जहाँ सान्दर्भिक होलान् त्यहाँ व्याख्या गरौंला ।

नेपालको विकास निर्माणको लागि योजना छनौंटदेखि लिएर प्रपोजल, प्रपोजल स्वीकृति, ठेक्कापट्टा र कामदारको छनौंटसम्म नै प्रसस्तै प्वालहरू हुन्छन् । यस्ता प्वालहरू कुनै जानिबुझी राखिएको र कुनै अन्जानवस नै रहेका हुन्छन् । जानिजानी राखिएको प्वालमा योजनाकारहरू आफै खेल्ने गर्छन् भने अन्जानमा नै परेका प्वालहरूमा अर्को खुराफाती छिरेर मज्जैले खेल्दछ । आफैले राखेको प्वालमा खेल्नेभन्दा मसिना प्वाल भेटेर खेल्ने चाहिँ झन सिपालु हुने गर्दछ ।

प्वाल र छिद्रहरूमा खेल्न पल्केको मान्छे ह्वाङ्ग उदाङ्गो प्वालमा खेल्न रुचाउँदैन किनकी उदाङ्गो प्वालमा खेल्न खेलाडी पनि उदाङ्गो नाङ्गो हुनुपर्छ । यसरी उदाङ्गो नाङ्गो हुँदा सबैले देख्ने र बुझ्ने हनाले खेलाडीलाई नदेखिने गरी खेल्नुमै मज़ा हुन्छ । पानी एउटा यस्तो तरल पदार्थ हो जुन ठूलो प्वालबाट त ह्वाल्ल छिर्छ नै मसिना छिद्रे प्वालबाट पनि रसाएर निस्किन्छ । खान र खेल्न पल्केकाहरू पानी झै छिद्रे प्वालमा पनि रसाउँछन् । ठूला प्वालबाट छिर्ने पानी बाड़ी बन्छन् भने छिद्रे प्वालबाट छिर्ने पानीले जमिन धसाउँछ अनि पैह्रो लडाउँछ ।

त्यसैले, हरेक प्वाल चाहे त्यो ठूलो होस् वा छिद्रे होस्, त्यसको पटक पटक समीक्षा गर्न जरुरी पर्दछ । समीक्षा गर्नेले पनि प्वाल अनुसारको नै समीक्षा गर्नु बान्छनीय हुन आउँछ । ठूलो प्वालमा समीक्षक भित्रै छिरेर समीक्षा गर्न सक्छन् तर पानी मात्रै रसाउने प्वालमा समीक्षक भित्रै छिर्न खोज्छन् भने पनि कुरा बिग्रिनजान्छ । पल पलकों समीक्षाले नतिजा निकाल्न सहज हुनुपर्ने हो । तर यता केही समयको पल पलकों समीक्षाले त्यति राम्रो अझ भन्दा सकारात्मक नतिजा ल्याउला जस्तो छैन । यी प्वाल समीक्षाका समीक्षकहरूको बुद्धि बेलामा बौरिसोस् ।

(नोटः यसमा एम.सी.सी.लाई पनि जोडेर हेर्न सकिन्छ ।)

२०७८ फाल्गुन १३ गते सुक्रवार
गल्कोपाखा, काठमाडौं