नेपाली हास्यव्यङ्ग्य अनलाइन पत्रिका

अन्जु शर्मा :

दरबारको जंगलमा हिजोआज चुनावको रौनक छ । पहिलेदेखि सिंहको मात्र एकलौटी शासन थियोे । सिंहको शासनदेखि रुष्ट बाघहरू हामी तिमीहरूको अण्डरमा सधैं बस्दैनौ चुनाव हुनपर्छ भनी उफ्रन थाले ।

चुनाव घोषणा भयो । चुनावमा बाघले सब भन्दा पहिले उम्मेदवारी दर्ता गरायो । सिंह झन के कम आफ्नो अधिकार कसैलाई दिने छैन भन्दै उसले पनि उमेदवारी दर्ता गरायो । यो जंगलमा अधिकार जति तिमीहरू को छ उति मेरो पनि छ भन्दै हुँडारले पनि उमेदवारी दर्ता गरायो ।

चुनावी वातावरण तातिँदै गएको थियोे । यसैबीचमा खरायो र मृगहरूले छुट्टै आमसभा गरि, जंगलमा हाम्रो पनि पूर्ण रूपमा हिस्सा छ । जंगल कसैको पेवा वा दाईजो हैन । हामीले पनि चुनावमा भाग लिन पाउनुपर्छ भन्ने मान्यताका साथ चुनावमा उमेदवारी घोषणा गरि स्वतन्त्रताको अनुभव गरे ।

माथि रूखमा बसेका चतुर कौवाहरू स्वतन्त्रताको नाममा यी मृग र खरायोको अस्तित्व धरापमा परेको भन्दै चिन्ता ब्यक्त गर्दै थिए । उसै समयमा गिद्धले केही दिनलाई सिकारको जोहो अरूले नै गर्दिएकोमा मुसुक्क मुस्काउँदै कागलाई चुप लगायो भनेर, लाटोकोसेराले आजको खुलामञ्चको आमसभामा जानकारी दियो ।

०००
रातोपुल, काठमाडौं