नेपाली हास्यव्यङ्ग्य अनलाइन पत्रिका

मनीषकुमार शर्मा ‘समित’ :

गोमन हतारिँदै झाडीभित्र पस्यो ।

“हैन किन आत्तिएर भागेको ?” उसलाई रोक्दै मित्र धामनले सोध्यो ।

“डराउनै पर्यो नि । देख्यो कि मारिहाल्छ ।“ उसले हतासमा जवाफ दियो ।

“त्यसो हैन । मनुष्यमा चेतना आएको छ । अझ, तिमी त सर्पराज, एक थोपा र्‍याल मात्र पर्यो भने पनि ऊ परमधाम पुग्छ ।“ धामनले ढाडस दिन खोज्यो ।

“खै के भन्नु ? केही दिनअघि मात्र उसले बाटो छेक्दा मैले डसेको थिएँ …“

“अनि ?”

“अनि के हुनु नि । उसलाई त केही भएन । मलाई भने तीन दिनसम्म असह्य पीडा भयो ।“

०००
मध्यपुर ठिमी, भक्तपुर