नेपाली हास्यव्यङ्ग्य अनलाइन पत्रिका

मनीषकुमार शर्मा ‘समित’ :

उनको धुमधाम स्वागत भयो । नयाँ ज्वाइँ, पञ्चरात बिताउन ससुरालीको बास, सबैबाट घेरिएका थिए । केही समय सञ्चो बिसञ्चोको भलाकुसारी पछि ज्वाइँ ससुराको वार्तालाप सुरु भयो ।

ससुरा, लघुकथाको विज्ञ, ज्वाइँ लघुकथामा नवप्रवेशी । दुवैको गफ खुब जम्यो । मतान्तर थियो त केवल समापनमा ।

खाना खाने समय सासु, सालीहरू र विभिन्न परिकारले घेरिएको ज्वाइँलाई खाना हजम गर्न निकै सकस पर्‍यो । मरेर थाल रित्याएका मात्र के थिए, सालीले कर गरेर फेरि खाना थपिदिईन् । टुलुटुलु ससुराको मुख हेर्न थाले ।
मुस्कुराउँदै ससुराले भने- “अघाएको पेटमा खाना थप्दा र लघुकथाको झड्कादार समापन पछि पुच्छर झुन्डाउँदा कहाँ मिठो हुन्छ त ज्वाइँनारान ।”

०००
मध्यपुर ठिमी, भक्तपुर