नेपाली हास्यव्यङ्ग्य अनलाइन पत्रिका

रामदेव पाण्डे :

आऊ प्रिया एक खेल खेलौँ
हुन्छ प्रिय खेलौँ खेलौँ
विदेश जान
ढाँटेपाटे बिहेबारी खेलौँ
पुगेपछि उता
च्यातौँ कागज बिहेदर्ताको
र लागौँ आआफ्नो बाटो
अनि
आऊ तिमी र म
पारपाचुकेको खेल खेलौँ
दिनभर तिमी र म
आफ्नो आफ्नो बाटो हिँडौँ
राति राति लुकेर भेटौँ
तिर्खा मेटौँ
साहुको होस् कि सहकारीको
रिन तिर्ने बेला
मैले तिमीलाई देखाउँछु
तिमी मलाई देखाउनू
कारण सोधे
छोडपत्रको कागज तेर्स्याउनू
अलि दिनपछि
काण्ड आफैं सेलाउँछ
चर्चा पनि हराउँछ
हो, त्यस बेला फेरि
डिभोर्सका कागज च्यातौँला
र हामी दुई फेरि
सँगै बाँचौँला सँगै नाचौँला
आऊ म्यारिज म्यारिज खेलौँ
आऊ डिभोर्स डिभोर्स खेलौँ !

०००
२०८१/०५/२८
काठमाडाैं