नेपाली हास्यव्यङ्ग्य अनलाइन पत्रिका

भोलानाथ सुवेदी :

यौटा गोरुले अर्को गोरु चिन्न सकेन
हिँड्नु पर्ने मेलोमा हिँड्न सकेन

बस्छु भन्छ ओथारोमा चल्ला कोरल्न
कस्तो गोरु पर्‍यो हजुर ट्वाल्ल परेँ म ।

खेत जोत्न हिँड भन्यो पाखातिर कुद्छ
बलमा पनि कमजोर छ निहुँ खोज्दै जुद्छ

देशभरि जुद्धा जुद्धै गोरु पर्‍यो थला
जोत्नु पर्ने धेरै थियो के पो गर्ने होला

कहिले हुन्छ सिन्दुरे कहिले पुत्ले पाङ्ग्रे
संसदभित्र छिर्छु भन्छ खान नपाको नाम्ले

साथी खोज्दै हिँडेको रे मीत लगाउन
कस्तो गोरु पर्यो हजुर छक्क परेँ म

थलो सर्न बल गर्छ मीठो मीठो खान
हवाईजहाज चढ्छु भन्छ विदेशतिर जान

आहाल बस्छु भन्दै पानी भित्र पस्छ
कहिले रुन्छ कहिले हाँस्छ नौटङ्की गर्छ

सबै जनाले घेरा हालौँ कम्मर कसेर
कसले नार्न सक्छ हजुर हेर्छु बसेर ।

०००
९८४३०५४१६१