नेपाली हास्यव्यङ्ग्य अनलाइन पत्रिका

मनीषकुमार शर्मा ‘समित’ :

“बाबा, यिनीहरू किन बाटोमा छाडिएका ?”

बाटोमा छाडा छाडिएका चौपायाहरूलाई इङ्गित गर्दै सानो छोराको प्रश्न थियो ।

“थारा, बेत बसेका वा दूध दिन छोडेका र बिरामी गाईगोरु बेवारिसे अवस्थामा छोडिदिन्छन् ।”- मैले उसको जिज्ञासालाई मेटाउन कोसिस गरेँ । मेरा कुरा अलि बुझेन । उसलाई सजिलो भाषामा अर्थ्याउँन  प्रयास गरेँ- “यिनीहरू काम नलाग्ने भएर छाडेको ।”

“अनि यिनीहरू के खान्छन् त ?”
“कहाँ बस्छन् त ?”
“यसरी बाटोबिच बस्दा दुर्घटना हुँदैन त ?”

उसको प्रश्नहरूको ओइरो लाग्यो । एकएक गरी जवाफ दिँदै अघि बढ्दै थिएँ । ऊ टक्क रोकियो र पुनः प्रश्न तेर्स्यायाे – “यिनीहरू पनि काम नलाग्ने भएर छाडिएका हुन् ?”

मैले उसले औँल्याएतिर हेरेँ ।
सडक पेटीमा बेसहारा महिला र पुरुषहरूको झुन्ड थियो ।

०००
मध्यपुर ठिमी, भक्तपुर