नेपाली हास्यव्यङ्ग्य अनलाइन पत्रिका

माणिकरत्न शाक्य :

हास्यकलाकार राजाराम पौडेलले २०७१ सालको गाईजात्रे कार्यक्रमको रिर्हसलका निम्ति अर्का हास्यकलाकार शिवहरि वैरागीलाई बोलाएछन् ।

शिवहरिलाई राजारामले वैठक कोठामै लगेछन् । पहिलो दिनको रिर्हसल सके लगत्तै शिवहरि घर फर्केछन् । उनी फर्केपछि आमाले सोधिछन्- बाबु राजाराम ! शिवहरि वैरागी भन्या कुन थरी हो बाबु ? राजारामले मौकामा चौका हान्दै आमालाई दलित हो भनिदिएछन् ।

शिवहरि दोश्रो दिनको रिर्हसलका लागि भोलिपल्ट राजाराम दाइको घरमा पस्दै गर्दा- राजारामकी आमाले त्यहीँ तल बस्दै गर्नु, म राजारामलाई तलै पठाइदिन्छु भनेर माथि उक्लनै दिइनछिन् । आमाको व्यवहारले शिवहरि त ट्वाँ । तलै बसेर रिर्हसल गरिरहेकै बेलामा आमा तल पुगेर भनिछन्- बाबु त दलित हुनुहुँदोरैछ । राजारामसँग नछोइकन बस्नु है !

आमाको कुरा सुनेर शिवहरिले हँ हँ गर्दै अनुहार कच्याककुचुक पार्न थाले । त्यही बेलामा राजारामले मुसुमुसु हाँस्दै आमालाई सम्झाउँदै भनेछन्- हामी कलाकारको जात धर्म केही हुँदैन । आमाले झन् के के भनेर कुइँकुइँ गर्न थालेपछि राजारामलाई पुरै अप्ठ्यारो परेछ । अनि राजारामको पालो भेद खोल्दै आमालाई सुनाएछन्- उहाँ शिवहरि वैरागी भन्या त राजाको निधारमा टीका लाउने बाहुन हुन् नेपाल थरको । कहाँ दलित हुनु, हास्य कलाकारका पण्डित हुन् ।

तँलाई बज्ज्ये ! हिजो तैंले दलित भन्या हैन र ? आमाले राजारामलाई बेस्कन गाली गर्दै भनिछन् । राजारामले भनेछन्- ह्या आमा, मैले त ठट्टा पो गर्‍या त

०००
चाबहिल, सरस्वतीनगर