नेपाली हास्यव्यङ्ग्य अनलाइन पत्रिका

डा. टीकाराम पोखरेल :

राजनीतिक बजार तात्यो :
– एमालेमा शीर्ष नेताहरु बिचको विवादले तीव्र ध्रुवीकरण ।
– काङ्ग्रेसमा संस्थापनइतरमाथि कारवाहीको डण्डा चलाउँदा इतर पक्षबाट बिद्रोहको धम्की ।
– माओवादी अध्यक्षलाई आफ्‌नै विश्वासिलाबाट चुनौती, पार्टी छोडेर जान सुप्रिमोको चेतावनी ।
– राप्रपामा नेतालाई जिम्मेवारीबाट हटाइँदा पार्टी फुटको सङ्घारमा ।
– रास्वपाको संसद बहिष्कार यता न उता, परिणाम कता न कता ।

तर आर्थिक बजार तातेन :
– शेयर बजार घट्यो ।
– घरजग्गा कारोबार ठप्पै छ ।
– मितेरी पुल बगायो । चीनसँगको व्यापार बन्द हुँदा राजश्व घट्यो ।
– भारतसँगको व्यापार सधैँ घाटामा । यो वर्ष घाटा झनै बढ्यो ।
– सांसदलाई निर्वाचन क्षेत्रमा बजेट दिँदा गौरवका राष्ट्रिय योजनामा भारी बजेट कटौती ।
– भ्रष्टाचारमा देश विश्वकै पहिलो स्थानमा पुग्ने डर ।

समसामयिक सवालमा एक विद्वान्‌सँग प्रश्नोत्तर :
– ‘आर्थिक बजार सेलायो, तताउन के गर्ने ।’
– उनले भने– ‘आगो लगाउने ।’
– म हासेँ, मज्जाले ।
– ‘किन हाँस्नु भो ?’ उनले मलाई नै सोधे ।
– ‘तपाईँको जोक सुनेर ।’ मैले भनेँ ।
– ‘म जोकर हो र ?’ उनको फेरि प्रश्न ।
– ‘मतलब, आर्थिक बजारमा आगो लगाउने कुरा ?’ मेरो हाँस्नुको स्पष्टीकरण ।
– ‘राजनीतिमा आगो लगाउँदा राजनीतिक बजार तात्छ भने आर्थिक बजार तताउन पनि उही सूत्र प्रयोग गर्नुपर्छ, आगो सूत्र ।’ उनको पनि स्पष्टीकरण ।

त्यसपछि उनको उपदेश :
– देशको अर्थतन्त्र रेमिट्यान्सले धानेको छ ।
– देश भ्रष्टाचारले डुङडुङ गनाएको छ ।
– देशभित्र उत्पादन केही छैन, निर्यात शून्य छ ।
– देशभन्दा नागरिक धनी छन् ।
– राजनीति गर्नुको मुख्य उद्देश्य पैसा, पैसा, पैसा ।
– राजनीतिक नियुक्तिमा जताततै बिचौलियाको हालिमुहाली चलिराको छ ।
– यी सब कुकृत्यमाथि आगो लगाउने कुरा गर्दैछु म ।

फेरि प्रश्न :
– ‘यी सबको समाधान के त ?’ मेरो प्रश्न ।
– ‘कुनै उच्च ओहदामा मेरो नियुक्ति ।’ उनको उत्तर ।
– ‘अनि आगो ?’ प्रश्न ।
– ‘त्यसपछि म निभाइदिन्छु ।’ उत्तर

उनको बकपत्र सुनेर फेरि म हासेँ– ‘खितखितखित …. ।’

०००
काठमाडाैं
मोबाइल : ९८५१०५३१२७
tikaram.pokharel@gmail.com